Хүний нөөц

Прокуророор ямар хүнийг томилдог вэ?

Дараах шаардлагыг хангасан Монгол Улсын иргэнийг прокуророор томилно:

Хуульчийн мэргэжлийн үйл ажиллагаа эрхлэх зөвшөөрөл авсан;
Хуульчийн мэргэжлээр 3-аас доошгүй жил, эсхүл прокурорын туслах ажилтнаар 2-оос доошгүй жил ажилласан;
Гэмт хэрэг үйлдэж гэм буруутайд тооцогдож байгаагүй;
Мэргэжлийн шаардлага хангасан, 25 нас хүрсэн.

Прокурорын туслах ажилтан болоход ямар шаардлага тавьдаг вэ?

Прокурорын байгууллагад прокурор чиг үүргээ хэрэгжүүлэхэд нь туслах үүрэгтэй ажилтнууд ажилладаг. Туслах ажилтнаар томилогдоход дараах үндсэн шаардлага тавигдана:

Хууль, эрх зүйн чиглэлээр их, дээд сургууль төгссөн;
Гэмт хэрэг үйлдэж, шүүхээр гэм буруутайд тооцогдож байгаагүй;
Төрийн албаны шалгалтад тэнцсэн;
Цэргийн алба хаасан байх (эрэгтэй).

Эдгээрээс гадна компьютерийн программ ашиглах, бичиг хэрэг боловсруулах зэрэг чадварыг харгалзан үздэг.

Сонгон шалгаруулалт

Улсын ерөнхий прокурорын газраас хүний нөөцөө бүрдүүлэх зорилгоор жил бүр, Улсын ерөнхий прокурорын 2022 оны А/19 дүгээр тушаалаар батлагдсан “Прокурорын байгууллагын захиргааны албаны удирдах болон гүйцэтгэх албан тушаалын сул орон тоог нөхөх журам”-ын дагуу прокурорын туслах ажилтны сонгон шалгаруулалтыг зарлан явуулдаг.

Сонгон шалгаруулалт явуулах тухай зарыг шалгаруулалт эхлэх өдрөөс 30-аас доошгүй хоногийн өмнө байгууллагын цахим хуудас (prokuror.mn) болон хэвлэл, мэдээллийн хэрэгслээр нийтэд зарладаг.

Шалгаруулалтын хүрээнд 4 төрлийн шалгалт авна:

Эрх зүйн ерөнхий мэдлэгийн сорилго;
Эссэ бичлэг;
Ярилцлага;
Компьютерийн хэрэглээний программ ашиглах чадвар.

Эхний шатны сорилгод тэнцсэн иргэнийг дараагийн шатны шалгалтуудад оруулна. Шалгалтад оролцогч нь хуульчийн мэргэжлийн үйл ажиллагаа явуулах зөвшөөрөлтэй бол эрх зүйн ерөнхий мэдлэгийн шалгалтаас чөлөөлөгдөнө. Сонгон шалгаруулалтад тэнцсэн иргэдийг прокурорын байгууллагын хүний нөөцийн бүртгэлд авч, сургалтад хамруулна.

Захиргаа, үйлчилгээний ажилтнаар хэрхэн ажилд ордог вэ?

Прокурорын байгууллагын захиргаа, үйлчилгээний ажилтнаар орохоор хүсэлт гаргасан иргэний материалыг Улсын ерөнхий прокурорын газрын Хэрэг эрхлэх газар, эсхүл аймаг, Нийслэл, Тээвэр, дүүрэг, сум дундын прокурорын газарт хүлээн авч шийдвэрлэнэ.

Бүрдүүлэх баримт бичиг

Төрийн албан хаагчийн анкет;
Ажилд орохыг хүссэн өргөдөл;
Боловсрол, мэргэжлийн диплом, гэрчилгээний нотариатаар гэрчлүүлсэн хуулбар;
Намтар (3 үеийн);
Нийгмийн даатгалын дэвтэр, Эрүүл мэндийн даатгалын дэвтэр;
Иргэний үнэмлэхний хуулбар;
Төрийн албаны мэргэжлийн шалгалтад тэнцсэн болон төрийн албаны тангараг өргөсөн тухай материал (төрийн үйлчилгээний албан тушаалд томилоход хамаарахгүй);
Урьд ажиллаж байсан бол чөлөөлөгдсөн тушаал, тодорхойлолт;
Цээж зураг 4 хувь (3×4);
Ял шийтгүүлж байсан эсэх тухай цагдаагийн байгууллагын тодорхойлолт;
Эрүүл мэндийн дүгнэлт.